關心妍（Jade）自囡囡楊榮心（心心）出世後一直專心湊女，去到今年Jade決定重投歌手身份舉行入行18年首個內地巡迴演唱會「Touching Moment Concert Tour」，七月十三日會於廣州舉行首站，然後會到深圳、東莞和佛山等地進行巡唱。
入行18年的Jade，推出了不少經典慘情歌，如：《負擔不起》、《你有心》、《我太強》、《慘得過我》 、《放生》、《仍然》和《失戀哲理》等。她直言每次到內地工作，都會被歌迷問何時開騷？這次她終於能夠兌現承諾，Jade說︰「內地的巡迴真係等咗好耐，一直都等一個啱嘅時機，內地歌迷問咗十幾年都未實現到，今次意義好大，而今年香港的場地好爆，希望明年2020可以將巡唱帶回香港。」
日前Jade為演唱會海報拍攝，一有時間就跟囡囡玩視像電話，Jade經常和囡囡在屋企玩「廚飯仔」焗麵包和蛋糕，心心一見到媽咪就話要食「包包」和士多啤梨，兩母女更隔空合唱心心的最愛兒歌《太陽伯伯》，Jade說︰「心心每日要聽十五次以上，歌詞背到好熟，哈哈！希望第一站帶埋心心到場，佢出世之後都未見過舞台上嘅媽咪，有俾啲片佢睇過，每次見到媽咪唱歌都好興奮，先幫佢申請定張回鄉証先。」
