馬國明於劇集《白色強人》中飾演醫生唐明，性格清高，無慾無求；現實中的他，雖然被稱好男人，但他自命不夠清高，因最愛錢，「早前電視都有講，作為香港男人真的好大壓力，因為香港是最難買樓的地方，物價又高，所以生活在香港的男人好辛苦，我自問無唐明咁清高，他樣樣都唔要，但我點都要錢，因為父母年紀開始大，生活水平又高，將來我都會結婚生子，需要有一個穩定的經濟基礎維持；而娛樂圈算是邪門的工作，可能突然間，你會完全消失，所以當你有能力去賺錢時，就盡量努力去做，為將來積穀防飢，儲起來，當有需要的時候就可以用，這是我多年來的理財哲學。」
他表示早年試過投資股票，不足一星期已損失四十萬，害他肉痛得連覺也瞓不着，「幾年前我試過買人生第一隻股票，聽朋友講話邊隻邊隻會升，一定賺就去買，打算賺少少就走，怎知不夠一星期就無晒四十萬元，當刻真的好肉痛，幾晚都瞓不着，慘呀！這個教訓好深刻，因為當時沒有太多賺錢的工作，令我體會到每一件事都有正有反，正因為你輸過，買過教訓，如果現在才第一次買股票，我相信就不止損失四十萬那麼少，因為搵得多就會博得愈大，幸好當時不是搵太多錢。」
投資失利，令他明白投資磚頭最穩陣，繼一六年以二千多萬購入太古城後，三個月前他又以數百萬再次置業，用作收租，「我不懂投資，所以磚頭對我來說是最穩陣及實際，一直都有留意香港樓市，想用作收租，所以基本要求起碼要有兩間房，有個梗廚，三、四百呎的上車盤就最穩陣，多租客合用，所以我三個月前就決定購入這類型樓作投資，主要用來放租，很多人可能唔知，其實我數口都幾精，一定會計好晒條數，租金可以蓋過供樓條數就最穩陣，當然要儲首期，幸好自己早兩年開始，每年都可以返內地工作賺人仔，慢慢就儲到一筆錢，因為是長線投資，回報都需要幾年後，其實只要賺過通脹就已經贏了，總好過放在銀行，都無利息。」