衛蘭（Janice）與胞妹衛詩（Jill）熱衷慈善，繼早前到多倫多等地出席生命分享會，兩姊妹將於10月7日再度合體，聯同Robynn & Kendy、樂隊FreshLife、新進唱作歌手Zino Chan等單位，參與「一首歌一個希望」慈善音樂及生命分享會2019，以歌聲傳達愛與希望，撫平生命的傷疤。
Jill憶述在低谷裡如何自處，她不諱言：「以前嘅我曾經好迷失，嗰段日子可以話係人生最低谷嘅時期，咁大個女從未經歷過咁抑鬱、咁孤獨嘅時間，我唔敢出街，只係想收埋自己，試過想放棄一切。」
Jill又表示姊姊Janice是她的天使，而鄭秀文（Sammi）的鼓勵也是雨後春筍。「當時Sammi帶咗好多書嚟探我，其中一本就係我嘅第一本聖經，佢同我講：『就算所有人都覺得你唔好，唔緊要，最緊要係神點睇你、你嘅身份係神嘅女兒，唔好介意其他人嘅話語。』我感受到神嘅力量，係實在地拯救咗我。」
現時Jil除了致力投身慈善工作，亦希望透過歌聲鼓勵同路人走出低谷。「新歌《幸福相擁》令我諗起好多曾經幫助我嘅人，喺我最軟弱嘅時候扶起我，希望大家聽到呢首歌，會諗起身邊嘅英雄，無論遇到乜嘢難關，佢哋都會喺度陪住我哋。」
Janice從小因受到親朋好友的比較，令她與妹妹自小心存競爭：「我哋細個感情唔好㗎，始終我哋係孖生姊妹，由細到大都被別人比較，自自然然令我哋產生咗一份競爭嘅心態，所以我哋成日吵架，無辦法用平靜嘅心態同對方溝通。」
直至Janice成為基督徒，她開始學習如何愛人：「人有五種愛嘅語言，其中一樣係『肯定的說話』，踏出一步、用正面嘅說話去鼓勵妹妹，慢慢地，當佢感受到被愛、知道我有幾愛佢，我哋嘅關係變得愈來愈好，依家係我哋感情最好嘅時候。」
近月推出首張福音專輯《In His Name》的Janice，十分感激公司願意冒險，不計成本、不理銷量地支持，她認為這是使命：「我同妹妹一直以嚟有個心願，就係透過我哋嘅聲音去幫助別人，我哋視呢個為使命。新專輯籌備超過年半，最大嘅困難係搵填詞人，最後透過祈禱，喺神嘅幫助下終於搵到適合嘅人。」
Janice自言一向熱愛運動，因而催生《運動詩歌》這新曲，她表示：「我天生有脊柱側彎，五年前做瑜珈拉傷，照X光先發現側彎問題已經好嚴重，坐得耐會痛，有時彎腰都會痛。」即使備受腰痛折磨，Janice仍然心存感恩，表示會學習和痛症共處，並會多鍛練背部肌肉來改善情況，完美體現了堅持愛、擁抱希望的信念。
