林子善與太太董佩欣（Kary）2019年誕下愛女「小乖乖」林以晴，而子善過去一年多主力做湊女公，不時在社交網分享溫馨的父女時刻。不過Kary因工作忙碌，而少了與囡囡相處的時間，子善昨日發長文指太太對於未能逗笑小乖乖而感到氣餒，他希望網民為太太打氣，讓她重拾信心。
子善寫道：「昨晚老婆有啲唔開心，好似食咗Wasabi咁眼有淚光！我問佢係咪我做錯野？工作壓力好大？佢搖搖頭，我話究竟咩事？講俾我聽佢話點解佢氹極小乖乖都會喊，一見到我就收聲唔喊？我同佢解釋小朋友其實好簡單因為乖乖出世嘅時候大多數係我照顧佢，而你就要返工，呢個係正常架第日佢大個之後佢就會明白，媽媽係幾咁辛苦為佢，其實我老婆當然明白呢個咁簡單嘅道理啦！」
他又表示會用盡方法給太太正能量，「咁呢個post係想講啲乜嘢呢？就係俾返小乖乖知道你點對媽咪，亦都希望我老婆知道我同乖乖點都喺後面支持佢，亦都知道佢工作壓力好大，而最重要嘅係希望咁多位留言俾多啲正能量我太太，我當然會用盡一切嘅方法俾佢正能量佢啦，希望有咁嘅經歷嘅媽媽可以話到比佢知呢啲係好平常嘅事I LOVE YOU MY QUEEN.」圈中朋友胡杏兒亦送上心心以示支持，陳自瑤則留言：「正能量派送！媽媽係最偉大嘅！」子善也回覆說媽媽十分偉大，「唔係講笑，當你睇過順產嘅過程，重要唔用任何麻醉，老婆當時嘅情況同電影驅魔人個女仔一樣，就會明白爸爸點樣都比唔上媽媽……嗰種痛楚到而家都歷歷在目。」
圖片來源：林子善@Instagram