一連六場《MIRROR “ONE & ALL” LIVE 2021》演唱會已圓滿落幕，除咗MIRROR 12 子唱功進步受網民讚賞，舞台服裝方面亦成為一時熱話，甚至有人認為係一個小型時裝展！當中Tiger（邱傲然）演唱哥哥作品《大熱》時，身上的一條頸鏈甚至夠哂用嚟俾400萬上車盤首期，到底係何方神聖？
呢條頸鏈嚟自日本潮流界神級銀器品牌Goro’s，日本男神木村、潮流教父藤原浩同香港潮男余文樂都有密密戴上身，而品牌最具代表性嘅作品一定要數金頭大鷹同先金羽毛。從照片中可見，Tiger頸上的銀器正是金頭中鷹加先金羽毛的組合，炒賣市場價格分別高達50萬和10萬，勁過早前用特別方式曬錶嘅大台藝人胡鴻鈞。至於姜濤在演唱會穿上的Cartier Juste Un Clou 鑽石頸鏈，Alexander McQueen 春夏西裝等服飾都未必夠呢條鏈仔貴。
至於點解會咁貴？全因為Goro’s 呢間舗太有性格，要買金頭大鷹唔單只要俾錢，仲要同店員起碼打好10年關係以上先會賣俾你，所以普通人都唔會買到……除非你真係好有錢（呢個世界有錢真係……）。至於先金羽毛，每年只係生產少量，所以炒到10萬起跳都有價有市。你想問Tiger點解有得戴？睇下佢Instagram 就知，事關佢同香港某Goro’s 買取店有合作，之前拍《WARRIOR》已經同MIRROR成員一齊戴Goro’s 喇。
《WARRIOR》MV
部分圖片來源：余文樂、邱傲然＠Instagarm，MIRROR@YouTube、my TV SUPER(www.mytvsuper.com)
