唱作女子組合「Beanies」，成員包括張天穎（Jaime）、陳樂頤（Geor）、潘釗彤（Chiutung）、李凱翹（Kay）及黃健怡（Winky），繼2月情人節推出首支派台作品《公主抱》後，第二首派台作品《最佳女團友》於昨日（16日）正式上架。
新歌由五人及蘇道哲一同作曲、填詞方面則找來小克操刀，Beanies表示這是她們首次跟二人合作，「最開始係我哋五個自己一齊創作，出咗好多個唔同嘅demo版本後，我哋就遇上阿道（蘇道哲），好快我哋約上錄音室傾吓又Jam吓，互相了解大家嘅創作，然後阿道再俾多啲inspiration我哋，最後就得出咗今次呢首歌。」MV部份則由YouTuber兼導演Boris操刀，團隊齊齊飛到台灣拍攝並遊走多個場景，包括：新竹民宿、內灣車站、「內灣老街」夜市、溪澗等，行程緊密。
提到拍攝難忘事，Chiutung及Kay表示冒雨爬溪澗，Kay更跣腳跌倒；Winky則謂清晨五時起牀化妝預備拍攝；Jaime坦言走獨木橋最驚心動魄，「我腳震呀，因為我畏高，每行一步條橋都會搖，最後Winky孭住我，公主孭，哈哈。」Geor指這次拍攝過程很多驚喜，原來是因為拍攝團隊跟Jaime一早夾好，Jaime謂：「好多嘢都係Boris同佢哋個team同我講：『嗱，我哋陣間會咁咁咁，但你唔好講住，我要拍佢哋最真實嘅反應。』我忍得好辛苦呀。」不過，講到最難忘的事，五人一起說：「今次旅程令我哋最難忘嘅係五個人一齊中咗甲型流感，發燒發到去埋台北急症室！小克嘅歌詞好似寓言咁全部都成真，最終五個都宣告陣亡！」