繼三年前的《蝸牛》後，江𤒹生（AK）找來MIRROR隊友兼好兄弟陳卓賢（Ian）再次為他譜寫新作《Blue Monkey》，當中超高音部分擺明要挑戰AK唱功！而MV今次特地在美國拍攝，更仿效美式MV氛圍，既有靚景，又有美女，AK更要大騷八嚿腹肌，十分吸睛！
相隔三年再由Ian操刀寫歌，AK表示邀歌冇難度，不過Ian卻用激將法要他飆高音！AK說：「Ian好爽快就答應幫我寫歌，冇游說好耐，佢的而且確用咗激將法要我挑戰高音，因為佢咁啱喺最尾寫咗句好高音嘅嘢，我問佢係咪認真㗎？佢就話：『你咪試下唱囉！』」AK又解釋今次歌名《Blue Monkey》的名字由來，「我平時會睇一啲New Age嘢，其中有提及Blue Monkey，代表一個人要玩得開心啲，呢個係喺世界裏面嘅其中一個任務，有啲人會成日唔記得點樣去玩，我之前做嘢都係咁，太認真，唔識玩住去做，結果個人冇咁開心，亦做得冇咁好，最後慢慢發現，有啲嘢可以放鬆啲，輕鬆啲玩住去做，效果會更加好，同Oscar溝通之後，就有呢個歌詞內容嘅決定。」
《Blue Monkey》推出之前，AK因為要到紐約參與電影節，所以就有了在當地拍MV的念頭，AK另外補充了今次MV Idea的源頭，「平時睇開外國MV都不外乎係Party、女伴，難得去到美國，當然好想拍到咁樣嘅MV，因為外國啲屋好大景又靚，想做嘅效果就似返外國氣氛多啲。」在靚人靚景下，AK拍攝過程也份外輕鬆愉快，更毫不吝嗇大騷八嚿腹肌，他說：「今次真係有好多靚景，睇極都咁開心，外國地方大，就係因為地方大，唔知點樣選擇。」
除了出現選擇困難外，現場拍攝也遇上一些難度，因為要遵守當地拍攝規限之餘，揸車亦成了愛車之人AK的一大難題，他說：「因為我哋租咗架1964年Mustang古董車，揸係要好有技巧，如果唔係好易死火。」不過見AK在MV中開着古董車在美國大街上遊走，相當有型，相信再多的難題，他仍樂在其中。
