男團MIRROR於6月7日至10日假九展舉行一連4場年度《Hi MIRO！見面祭》歌迷聚會，12子各佔一場，而「歌迷互動或表演時間」為30分鐘，餓位鏡仔與一眾MIRO作近距離接觸。一連4日的見面祭昨日（7日）假九展Star Hall舉行首兩場，由成員呂爵安（Edan）於下午2時半打頭陣，而陳卓賢（Ian）則於晚上7時半舉行第2場。
Edan身穿白色毛衣及牛仔褲登場，除了獻唱歌曲外，更走落台跟粉絲互動，相當寵粉。Edan在感動環節說心聲，他回想2018年12月MIRROR剛出道在九展舉行演唱會，當時演出仍然好深刻。相隔多年再站在這個舞台感覺很特別，這個演出地方之後不再有。他指自己不時會看歷年演出片段，會不滿意自己表現，「唱到咁、跳到咁，會笑自己，點解都會有人鍾意同支持。我每年回顧前一年嘅自己都有疑問點解會咁，但都係一個成長。同時令我深刻係不論我咩狀態、咩成就，你哋都一直喺我身邊支持，係好難能可貴及幾難嘅事，我要幾幸運先會有！多謝一直支持咁平凡的我，陪我慢慢進步同成長，為我做好多事。我只可以做好每份工作。想成為你哋的驕傲，想你哋終有一日會為我感到驕傲。」
而Ian則穿產黃色外套，以Sharp醒造型見Hellosss，他亦與粉絲們大玩遊戲，氣氛熱烈！Ian在台上分享道：「可能表面上有啲說話，我未必好將自己好內心嘅嘢，用言語間同大家分享嘅，但係其實一路好多嘢都默默擺喺心嗰度。而每一次多謝大家都係好衷心咁樣多謝大家，因為如果唔係在座咁多位同埋其他Hellosss，如果唔係大家嘅支持嘅話，今日真係唔會有企喺呢個台上面嘅我，好多謝你哋。」他又向粉絲剖白內心，「自己係有經歷過一啲比較情緒唔係幾好，又或者會更加將自己收埋，比起而家更加嚴重嘅一個我，但係係因為大家一直默默陪伴同埋支持，令到我一步一步咁樣繼續行落去。」
Ian指曾經有一段時間想放棄音樂事業，「真係好怕做呢一行，做呢一行要面對好多我原本玩音樂嘅時候冇諗過嘅一啲嘢，咁就覺得做音樂、寫歌好似唔係當初咁純粹。但係亦都的確係，大家都未放棄我嘅時候，我又覺得我唔可以放棄，咁所以係好多謝你，有你哋嘅出現。咁以前初初嘅時候就會見到大家同我講，多謝你多謝你出現成為我偶像，或者多謝你寫嘅歌幫咗我好多。但係其實我想講嘅係，你哋幫咗我好多，即係每次當發覺有啲，難關呀，有啲好唔開心嘅嘢嘅時候，可能就會睇下你哋IG嘅page呀，然後偷偷地睇下你哋喺TG group嗰度講呢乜嘢嘅時候，就會係一個好強嘅動力，令到我要繼續做好啲自己，做更加好嘅歌，又唔係話inspire人哋，但係希望大家可能聽嗰隻歌，會舒服啲會開心啲咁樣，呢個就係我最想做到嘅嘢。」
他坦言自己不是一日經常會好多甜言蜜語的人，「多謝你哋嘅包容，多謝你哋嘅耐性，因為我自己都覺得如果比著我遇到一個好似我自己咁嘅人，我都未必有好大嘅耐性去同佢接觸，花心機去了解呢一個人，咁但係我覺得你哋有段時間係比起我更加了解我自己，同埋亦都願意付出好多嘅耐心同耐性，陪伴住我見證住我做嘅所有嘢，咁我相信將來會越嚟越好嘅，我哋大家都會越嚟越好。」