唱作女團Beanies成員之一的Kay李凱翹，今年4月底推出首支個人單飛歌曲《分手的決心》後，日前，推出了第二首單曲《只因你悲觀》。
新單曲由Chelsea Rodgers作曲、李峻一填詞，山姆及Joe Lei編曲與監製，Kay指今次的曲風比較groovy，「咁有groove嘅編曲，配一份充滿着情緒掙扎歌詞，別有一番風味！首歌嘅bass啟發到我，除咗適合用聲音演繹首歌，原來身體都係一個好好媒介去演繹。」因此，Kay特別邀請Win Win為副歌部分排了舞步，「Win Win非常專業，喺我能力範圍內，排咗一段好有趣嘅舞，可以連繫到歌詞。」
能夠得到李峻一為新歌填詞，Kay特別多謝陳輝陽先生，「係佢介紹李峻一先生俾我，第一次網上見面，大家都覺得唔好寫情歌，一傾已經好快達成共識，除咗關係，情緒係每一個人都會面對嘅嘢，好多人淨係會識得叫人唔好唔開心， 但有時唔係我哋想唔開心！副歌部分，係非常直接憤怒嘅自己，喺我唔開心時，我只想叫你收聲；而verse部分同樣都係自己，不過係一個有情緒、好辛苦嘅自己。首歌關於情緒， 每一個人都會面對情緒問題， 希望可以用呢首歌接觸唔同嘅人！」Kay希望透過歌曲，令人有情緒時可以抒發到自己。
新歌在台灣找當地團隊拍攝，最令Kay難忘的是拍攝前扭傷腳，令到本來有跳舞部分的拍攝，迫於無奈地取消，「真係要忍痛取消跳舞部分，而製片非常好，佢本身想安排輪椅俾我，但因為要周圍走景，所以比較困難，最後，佢安排咗一張露營椅俾我，等我唔使埋位時可以坐吓！」有一段時間沒有說國語的Kay，一直都讀錯導演的名字，「去到臨拍完之前嗰一個鐘，我先知佢個名真正讀音，我超級抱歉！」Kay特別感謝Beanies的隊友Geor，「佢陪我拍到好夜，又幫我拍花絮片，我好愛佢！」
最令Kay意外的，是為她化妝的化妝師，原來是有份參加Netflix真人騷《The Boyfriend》，「因為拍MV時，個節目未播出，所以我係事後先知，佢依家勁紅，我好榮幸佢幫我化過妝，佢化得好好，真人超溫柔超nice！」
作為今年的女新人，又是獨立歌手的Kay，在沒有大公司支持下，半年內自資推出兩首歌曲，的確不容易。當了8年空姐，為追歌手夢而裸辭，為出歌將積蓄幾乎耗盡！Kay說雖然如此，但卻十分開心，「因為我做緊鍾意做嘅嘢，我本身想今年出三首歌，但真係唔夠錢，所以出埋《只因你悲觀》後，我要努力儲錢！」
