曾比特（Mike）自19年參加《全民造星Ⅱ》入行，去年憑《我不如》及《我不是邱比特》上位，唱片公司火速安排參加內地兩大綜藝《聲生不息》和《披荊斬棘2》，北漂九個月，Mike坦言經歷徬徨與不安。
Mike年幼喪父，母親一個湊大三個細路。入行前為幫補家計，Mike一日打兩份工，日頭正職做音響技術員、晚上兼職唱歌老師，今年成功脫貧，吸金近500萬，不過為圓母親「上車」心願，Mike仍然慳住使，難怪最近被網民拍到他乘搭港鐵，慳得就慳。
離開香港九個月，曾比特終於回港，為新歌《重見》宣傳。近年藝人到內地發展，都要承受被網民追擊的風險，Mike亦不例外，他只好憑歌寄意，希望跟香港樂迷「重建」關係，「畢竟離開了香港一段比較長的時間，今次除了重新開始香港的工作，亦想重新跟喜歡我的人重新建立connection，『重見』是再次見面，亦有另一個意思是重建。」
這次北漂之行，Mike坦言身邊沒有助手跟隨，單拖拉住四件行李便上機，「我好記得當日去機場，由香港飛去北京隔離，是自己拖住四件行李上機，這段時間要一個人處理很多東西，難免是有徬徨、有不安，好彩《聲生不息》一班歌手好似家人咁，好照顧我，幫我解決了很多問題。人生路不熟，教我點適應，例如當地的付款方式已經不一樣，要download很多APP，好多新事物要問得很仔細才明白，那段時間幾位前輩和導演幫了我很多，能夠參與這個節目，對我來說很榮幸。」
問Mike有沒有向唱片公司「詐型」？他說：「一直都有跟公司溝通，回到香港開了一個會，如果未來面對這些工作應該怎樣規劃呢？又不是投訴，希望有商有量。」不在香港的日子，Mike所屬公司環球發生不少變動，兩位師姊Gin Lee和Jace先後離巢，「我都唔係好知消息，回到香港才知道，慢慢去了解下，應該是跟公司的理念有些不一樣吧！我個人是很支持兩位師姊，我明白很多事情不能控制，冇得去點諗點解，只可以做好自己。」
在《聲生不息》翻唱《初戀》令Mike人氣急升，成功入屋，他的微博粉絲從五千人暴升過百萬追蹤，升幅相當大，而他亦憑可愛個性和獨特的爆炸頭獲幾個廣告青睞。據知，Mike綜藝的酬金達200萬，廣告亦升至120萬，Mike亦是近年最火速打入內地的香港藝人，問他是否已經賺到第一桶金？他說：「仲儲緊錢買樓呀！唔係報道講咁誇張，如果搵咁多，應該日日可以搭的士。」Mike曲線笑自己被網民拍到搭港鐵，「其實冇所謂，我都是普通人，平時好慳家，講真，我真係好少搭的士，盡量減少支出，我又唔需要去享受什麼生活，有時開工，我食個包就一餐，我又鍾意『掃街』，三十蚊都好好食㗎喇！」
Mike年幼喪父，入行前一日打兩份工幫補家計，日頭正職做音響技術人員，晚上兼職唱歌老師，高峰期要教三十多位學生，「從小到大，屋企都不算是小康之家，並不富裕，媽媽一個湊大三個是很辛苦，所以有能力的話，我想把資源放在屋企，給家人一個舒服的生活。我成日都會掛在嘴邊，希望盡快『上到車』，因為媽媽曾經講過，好想有一個屬於自己的單位，希望一家人住在一起，希望可以快啲做到。」未到三十歲的Mike是新一代慳仔，有自己一套理財方法，「講真，歌手好難每個月有固定收入，每次出糧，我會三分一儲起、三分一俾家用，每個月自己限住使四千蚊左右。」
化妝：Yaku
髮型：Derrick Ng @W workshop
場地：Studio Meta
