李璨琛（Sam）太太梁志瑩去年9月宣布再度懷孕，4歲囡囡李元元（Lucy）快將榮升家姐，Lucy媽媽趁昨日（5日）元宵佳節，在社交平台貼出孕照，原來是由Lucy揸機拍攝。她留言：「元宵佳節，女兒替我拍大肚照，實在是太值得紀念喇 #又叫我摸肚 #又叫我叉腰 #不過我覺得佢又影得幾好喎 #37周 #有感佢隨時會飄出嚟。」
懷孕37周的Lucy媽體態甚輕盈，連佘詩曼都留言讚：「Lucy靚媽」！網民亦讚：「37周好似5、6個月咁，正呀」、「Fit到咁」；同時有人猜估：「感覺上呢個胎阿B似妹妹」，更有網民發現：「老母條裙同Lulu條Legging襯埋㗎喎」。
