《最佳拍檔》贏到開巷，續集《最佳拍檔大顯神通》自然榮陞八三年賀歲擂台躉，為增強聲勢，新藝城推出「超值特刊」，貫徹「食腦」原則，請來林子祥專訪許冠傑，阿Sam直言最初對新藝城有戒心：「驚住俾人利用，主要係protect，但係留意佢哋工作，覺得佢哋好誠懇，對友情睇得好重；我自己細個好窮，住蘇屋邨，我鍾意大眾化嘅嘢，同新藝城一齊好relax！」阿Lam又抵死地問：「你好鍾意著fur㗎？」阿Sam直言：「我好怕凍，唯一fur最保暖，給我好安全感覺。」
在《最佳拍檔》慶功宴上，導演曾志偉當眾高歌一曲《無奈》，原唱者徐小鳳應邀前來「觀摩」，特刊內輯錄兩人的對話，志偉說選唱《無奈》，原來是阿Sam的主意，「而家去到邊度啲人叫我唱歌，梗係大聲叫《無奈》啦，所以而家公司貼晒大字報叫我做『無奈僧』，唔係曾志偉個『曾』。」小鳳姐轉數好快：「咁我係咩？『無奈尼（尼姑）』？」惹來哄堂大笑。